Jan Rappelsnut - Rappelsnut Jan - Döntjes, Lüdsnacks, Dänze, Leeder un Riemels för Jung un Old!

Direkt zum Seiteninhalt

Hauptmenü:

Diethard Wittholz, alias
Rappelsnut Jan

To Welt kamen in Hamborg, mit Mudder un miene dree Geschwister vör de Russen utneiht ut Meckelborg, dornah opwussen in Itzehoe, to School gahn in Wilster, lehrt in Elmshorn, studeert in Hamborg un opletzt na Reinfeld un Lübeck , nu tohus in Stockelsdörp.

Mien Platt is also „internatschonal“, as man so seggen kann.

Tohus in Itzehoe heff ick vun mien Vadder blots af un an desülvigen lustigen Geschichten vun Rudolf Tarnow hört - plattdütsch snackt heff ick nich; ick much Hamborger Platt lever hören as Meckelborger Platt…

Nieschierig wurd ick erst later, as mien Schoolfründ, Heinrich Lohse, een Jägersmann un Buer ut Kuskopper Moor bi Wilster, na de Jagd in’n Kroog mit sien‘ Jagdfrünnen tosamenseet un bi Köm un Beer lustige Saken blots op Platt vertellen dä.

Ganz langsam heff ick mi an dat Plattsnacken ranwagt, heff an de nedderdütsche Bühn in Lübeck as jugendlichen Liebhaber anfungen, denn hebt se mi an de Nedderdütsche Bühn na Niemünster holt, heff dor blangenbi een Hauptrull an’t Ohnsorg-Theater speelt un bi’n NDR in Hamborg un Bremen bi plattdütsche Hörspeele mitmakt.

Later heff ick bi den Kring „Jan un sien‘ Rappelsnuten“ meist 35 Johr mehr as 2.000 Jungs un Deerns de plattdütsche Spraak mit Döntjes, Riemels, Dänze un Leeder neger bröcht.
Nu mak ick mien Bregen fit dörch butenkopps lehren. Ick schriev Leeder, speel Gitarr un heff Freid doran, anner Lüd fröhliche Stimmung in’t Hus to bringen as
Rappelsnut Jan



Designed by N.Quurk März 2019 - Aktualisiert am 18.02.2024 - Heute ist - Es ist Jetzt
Zurück zum Seiteninhalt | Zurück zum Hauptmenü